ഷൈജു കോട്ടാത്തല

നീയതറിയണം...

2011-06-29T05:53:00.000-07:00

കാറ്റത്തു

കടുക് ചെടികള്‍ ആടുന്നത് പോലെ

നിന്‍റെ നിഴലുകള്‍ എന്‍റെ ചവിട്ടടികളില്‍ എല്ലാം

എനിയ്ക്ക് പേടിയില്ലെന്ന്

എന്നോട് ഞാന്‍ പറയുന്നതു പോലെ,

ഒരു പേടി വേറെ ഉണ്ടോ

നീ തൂങ്ങിച്ചത്ത പുളിമരം

നിഴലിടുന്ന വഴിയെ

നിന്‍റെ ചിരി ഓര്‍ത്തു

നടക്കുമ്പോള്‍

നാം ഒരു പെഗ്ഗ് ഒറ്റ വലിയ്ക്ക്‌ കുടിച്ചു

കണ്ണും മൂക്കും പുകഞ്ഞു,

ആദ്യമായല്ലെന്നു പറയും മുന്‍പേ

പരാജയപ്പെട്ടവര്‍

ഒറ്റ റണ്ണിനു മൈതാനങ്ങളില്‍

ഒരുമിച്ചോടി പരസ്പരം കാത്തവര്‍

ചിതല്‍ മുട്ടുന്ന ചെറ്റപ്പുരകളില്‍

രതിനിര്‍വേദങ്ങള്‍ തിരഞ്ഞ കൌമാരത്തെ

ഓര്‍ത്തു പരിതപിച്ചവര്‍

ഇപ്പോള്‍

പെയ്യാത്ത കരിമേഘങ്ങള്‍ പോലെ

മൂടിക്കെട്ടിയ മുഖം കുനിച്ചു

നിന്‍റെ അമ്മയും

അരിക്കാശു ചുരത്തുന്ന പയ്യിന്‍റെ

അകിട് കിടാവിനു കുടിക്കാന്‍ കൊടുത്തു

നിന്‍റെ അച്ഛനും

ചൂളം വിളികളാല്‍ കാതടഞ്ഞു

നിന്‍റെ പെങ്ങളും....

പേടിയാണെടാ എനിയ്ക്ക് നിന്നെ,

നീ തൂങ്ങിച്ചത്ത ഈ പുളിമരം

കടക്കുമ്പോഴൊക്കെ

നാളത്തെ മഴയ്ക്ക്‌ നിലം പൊത്തുമെന്നു

നീ കരഞ്ഞ നിന്‍റെ പുര

ഇതുവരെ മറിഞ്ഞിട്ടില്ല

നീയതറിയണം

ജനല്‍ കമ്പിയിലെ മഴത്തുള്ളി

2011-06-08T01:33:00.000-07:00

വസൂരിയുടെ
പൊക്കല്‍ പോലെ
എനിക്കീ ജനല്‍ കമ്പിയിലെ മഴത്തുള്ളി.

നിനക്കോ
പ്രണയത്തിന്‍റെ ഒരു തുള്ളി ഉമിനീര്‍,
ഒരു തുള്ളി മദജലം

കടലിനൊരു കോശം.
മാനത്തു കണ്ണിക്ക്‌ കണ്ണുകള്‍

തോട്ടു വക്കിലെ കൈതക്കൊരുമ്മ.
കാട്ടു കുരയ്ക്കു മഴവില്ലിന്‍റെ ഒരു തുടം

ശംഖു പുഷ്പത്തിന്
തുടയ്ക്കു വന്ന ഞൊണല്‍

ചില വളവുകള്‍

2011-05-23T21:52:00.000-07:00

എന്നെ അമ്പരപ്പിച്ച

ആദ്യത്തെ വളവു

വീട്ടില്‍ നിന്ന് 500m അകലെ,

മുറ്റത്ത്‌ നിന്ന് കൊണ്ട് കാണാവുന്ന

അമ്പട്ടന്‍ വളവാണ്.

ചന്തക്കു പോകുന്ന അച്ഛന്‍റെ സൈക്കിള്‍

പുളി മരത്തില്‍ ഇടിക്കുമെന്ന് തോന്നിക്കുമ്പോള്‍

അമ്പട്ടന്‍ വളവു ആരംഭിക്കും.

അല്ലെങ്കില്‍ അച്ഛന്‍

കറുത്ത പൂവാലിപ്പയ്യിന്‍റെ മീതെയോ

ലോനാശ്ശന്‍റെ വീട്ടു വാതിലിലൂടെ അകത്തേക്കോ

സൈക്കിള്‍ ചവിട്ടി പോകുമായിരുന്നു.

പിന്നങ്ങോട്ട് മരങ്ങള്‍ക്കിടയിലൂടെ വളവുകള്‍ തന്നെ.

ഉപ്പന്‍ മുള മുള്ളുകള്‍ക്കിടയിലൂടെ

മുറിയാതെ കേറുന്ന പോലെ

വളവുകളില്‍ നിന്ന് വളവുകളിലേക്ക്

അച്ഛന്‍ മറഞ്ഞു പോകും. ഞാന്‍ നോക്കി നില്‍ക്കെ.

വെറ്റക്കണ്ടത്തിലെ ഏണിക്ക് വെട്ടിയ മുള

വലിയ കല്ലുകള്‍ നടുവിനെടുത്തു വച്ച്

നീണ്ടു കിടക്കും.

കല്ല്‌ മാറുമ്പോള്‍

വളവു നിവരുന്നത്‌ കാണാന്‍

വളഞ്ഞ വാലുമായി പുച്ഛിച്ചു ചിരിച്ചു

ടോമി അടുത്തുണ്ടാവും,

കൂടെക്കൂടെ എന്‍റെ കൌതുകത്തിന്‍റെ മേല്‍

കാല് പൊക്കി പെടുത്തു കൊണ്ട്.

ആ കുളിരാണെന്‍റെ കവിത.

മിണ്ടാത്ത അയല്‍ക്കാരന്‍റെ

പറമ്പ് നിറയെ മാമ്പഴം വീഴ്ത്താന്‍

ബോധപൂര്‍വം യത്നിക്കുന്ന മൂവാണ്ടന്‍റെ വളവു.

വളഞ്ഞ മാവിന്‍റെ

ഇല മുട്ടി നില്‍ക്കുന്ന ഓടിട്ട വീട്ടിലെ

അമ്മായിക്ക് വളയുന്ന

അമ്മാവന്റെ വളവു.

കുരുത്തക്കേടിന്റെ കൌമാരം

മാറ്റിവരച്ച ലിoഗത്തിന്റെ

വലത്തോട്ടുള്ള വളവു.

എന്നും കൂട്ടിനുള്ള അക്ഷരങ്ങളുടെ

മഴവില്‍ വളവു.

മൂത്രപ്പുരയില്‍

രണ്ടാണുങ്ങള്‍ വളയുമ്പോള്‍

അബദ്ധത്തില്‍ നോക്കിയ എന്‍റെ വളവു.

തിരിഞ്ഞും തിരിയാതെയും

കടന്നു പോകുമ്പോള്‍ പിന്നാലെ

പതുങ്ങി വരുന്ന 'S' കത്തിയുടെ വളവു.

എത്രയെത്ര വളവുകള്‍.

പ്രാര്‍ത്ഥന

2011-05-06T10:31:00.000-07:00

ഞാന്‍
കര്‍ണ്ണനാകുന്ന നേരം
ഗുരു ഉറങ്ങാതിരുന്നെങ്കില്‍.

കുളം

2011-04-23T13:43:00.000-07:00

പല്ല് കൊഴിഞ്ഞൊരു
വൃദ്ധ ചിരിച്ചപോല്‍
തൊണ്ണ കാണിച്ചു
വരണ്ടു കിടക്കുന്നു
ഓളങ്ങള്‍ തല്ലിയിളക്കിയ
കല്ലുകള്‍
ചാരെ കിടത്തി കുളപ്പടവ്.

താഴെ
ഒരായിരം പയ്യിനു തിന്നുവാന്‍
പുല്ലും വിരിച്ചു കിടക്കുന്നു
എന്റെ ഗ്രാമത്തിന്‍
മരിച്ച കണ്ണ് .

കളിയാക്കല്‍

2011-03-28T08:25:00.000-07:00

മീന്‍ വറക്കുന്ന
മണം പോലെ കവിത വരാറുണ്ട്,
ചക്കിപ്പൂച്ച കട്ടുതിന്നെന്നു പറഞ്ഞു
വിളമ്പി കിട്ടാറില്ല.

പാവക്കയുടെ മുഴുപ്പ് പോലെ
കാണാറുണ്ട്
കയ്ക്കുമെന്നു കരുതി
ഞാനത് പൊട്ടിക്കാറില്ല.

തിരകള്‍ പോലെ വന്നു
സ്വസ്ഥതയുടെ മണലെടുത്തു
പോകും,
തിരിയെ തരുമെന്ന് പ്രതീക്ഷിച്ചിട്ടില്ല.

കാക്കയുടെ പറക്കല്‍ പോലെ
കണ്‍ വെട്ടത്തുണ്ടാവും
കളിയാക്കുന്ന മട്ടില്‍.
കടാക്ഷിക്കുമെന്നു പ്രതീക്ഷിച്ചിട്ടുണ്ട്

എസ്.എസ്.എല്‍.സി. ബുക്ക്

2011-03-20T06:01:00.000-07:00

എസ്.എസ്.എല്‍.സി.ബുക്കില്‍ രേഖപ്പെടുത്തുന്നതിനു
രണ്ടു അടയാളങ്ങള്‍ പറയണം
ഉടുപ്പൂരി പരസ്പരം പരിശോധിയ്ക്കുമ്പോള്‍
നിങ്ങളിതുവരെ സ്വന്തം ശരീരം ശ്രദ്ധിച്ചിട്ടില്ലെന്ന്
ഓര്‍മപ്പെടുത്തുന്ന മട്ടില്‍
അടയാളങ്ങള്‍ വിജയകരമായി എഴുതി കൊടുത്തിരിയ്ക്കുന്നു
പെണ്‍കുട്ടികള്‍.
ശരിയാണ്
ഞങ്ങളിങ്ങനെ മീശയില്‍ മാത്രം ശ്രദ്ധിച്ചു ഇരിയ്ക്കുകയായിരുന്നു
എന്തൊരു വളര്‍ച്ചയാണീ പെണ്ണുങ്ങള്‍ക്ക്‌!!

മദം

2011-03-14T10:21:00.000-07:00

മദം പൊട്ടിയാന നടക്കാന്‍ വന്നൂ
വയല്‍ വരമ്പ് പോല്‍
ഞാന്‍ കിടക്കുമ്പോള്‍.
ഇടിഞ്ഞു വീഴുമെന്‍ ശരീരമോര്‍തല്ല
പിടഞ്ഞു വീഴുമാ
മെലിഞ്ഞ പാപ്പാന്റെ
ഉടല് കണ്ടു ഞാന്‍ കണ്ണ് പൊത്തുന്നു .

അരുത്

2011-03-10T00:37:00.000-08:00

ചൂണ്ടയില്‍ കൊരുത്ത
മത്സ്യം
വഴുതി പുഴയിലേക്ക്
വീഴുമ്പോള്‍ അനുഗ്രഹിക്കരുത്
രക്ഷപ്പെടൂ എന്ന് .

ഇവ്വിധം

2009-11-24T01:36:00.000-08:00

കണ്ടില്ല ഞാനിതുവരെ
പന്തലിചെന്റെ പുരയ്ക്കു മീതെ
അതിരു കടന്നയലത്തുന്നു
വന്നു നില്ക്കുന്ന മരങ്ങളെ.

കണ്ടില്ല,
എവിടെ പോകുന്നെന്നു
മതിലിലിരുന്നു ചോദിയ്ക്കുന്ന
കുമ്പളത്തിന്റെ വള്ളിയെ.

കണ്ടില്ല,
കൂട്ടിലിട്ടു പൂട്ടിയിട്ടും വാലാട്ടുന്ന പട്ടിയെ
വാഴക്കയ്യിലെ കാക്കയെ
ചെമ്പരത്തി പൂക്കളെ.
പോകും വഴി
വല്ലപ്പോഴും എതിരെ വന്ന പെണ്‍കുട്ടിയും
ഏറ്റത്തോട്ടു വളഞ്ഞു പോകുന്ന
നാട്ടുവഴിയ്ക്കൊരു വശം
എല്ലാ നാളും തുറക്കുന്ന മാടക്കടയും
എവിടെപ്പോയി!!

ഇങ്ങനങ്ങ് പോകുകില്‍
തീക്കൊള്ളിയില്ലാത്ത
കൂടുപോല്‍ വാക്കൊഴിഞ്ഞൊരെന്‍ ഭാവന
എത്ര കാലം പിടയ്ക്കണം
പാതിയെണ്ണ കിടക്കുമീ തിരി കെട്ട
മണ്‍ചെരാതുകള്‍ കാണുമ്പോള്‍.

മാഷ്

2009-11-19T22:17:00.000-08:00

മാഷ്
ഒരു മനുഷ്യന്‍
ഉരുണ്ട കല്ലുകള്‍ പോലെയാകുന്നത്
അനുഭവങ്ങളാല്‍ കോണും മൂലയും പോയി
അരികുകള്‍ മിനുസപ്പെടുംപോഴാണല്ലോ

അത്തരത്തില്‍ ഒരു ഉരുണ്ട കല്ലാണ്
കഷണ്ടിത്തലക്കാരന്‍ അപ്പുമാഷ് .
മാഷ് ചവയ്ക്കുന്നത്‌ വെറ്റേമാനും
തുപ്പുന്നത് കണക്കുമാണെന്നാണ്പറയുക.
ഓര്‍ത്താല്‍ മാഷിനെപ്പോലെ ചട്ടമ്പികള്‍
ഇല്ലായിരുന്നു നമ്മുടെ നാട്ടില്‍

കൊന്നിട്ടില്ലെന്നേയുള്ളൂ
കവലയിലിട്ടു
ചവിട്ടിത്തേച്ചിട്ടുണ്ടു പലരെ
കെട്ടിയില്ലെന്നെയുള്ളൂ മൂന്നുണ്ട് മക്കള്‍.

ജയിലില്‍ കിടന്നിട്ടില്ലെന്നെയുള്ളൂ
തള്ളിപ്പോയതാണ് കേസുകള്‍

പാതി രത്രിയില്‍ ഒറ്റയ്ക്ക്
സെമിത്തേരിയില്‍ വാശിയ്ക്ക് പോയിട്ടുണ്ട്.
കൊങ്ങയ്ക്ക് കുത്തിപ്പിടിച്ച്
കുരുത്തംകെട്ട പിള്ളേരെ
പള്ളിക്കൂടത്തിനു പുറത്ത്എറിഞ്ഞിട്ടുണ്ട്

ഗീതയും ഖുറാനും ബൈബിളും
വായിച്ചാണ് മാഷിന്റെ
പത്തിതാണതെന്ന്
പറയാറുണ്ട് മില്ലുകാരന്‍ ശങ്കരന്‍.

ഈ കല്‍ക്കണ്ടം തിന്നണം എന്നാണ്
ഓരോ പുസ്തകവും നീട്ടിക്കൊണ്ടു
പറയാറ്.

സമാധാനത്തിന്റെ വെള്ളക്കൊടി പോലത്തെ
നരച്ച മുടിയിഴകള്‍ മാടി
കറുത്ത കണ്ണടയ്ക്കുള്ളിലെ വിടര്‍ന്ന കണ്ണുകള്‍
ചുളിച്ചു
ഇതു പോലെ എല്ലാം വന്നു ചേരുമെന്ന്
ഊന്നു വടി കാണിച്ച്
മാഷ് പറഞ്ഞതു ഓര്‍മയില്ലേ...

ഇപ്പോഴും മനസ്സിലാകുന്നില്ല
മാഷിന് വന്‍തുകയുടെ ഇന്‍ഷുറന്‍സ്
എന്തിനായിരുന്നെന്ന്
അത് കൊണ്ടല്ലേ തല തല്ലിപ്പൊട്ടിച്ചു
മാഷിനെ മാഷ് തന്നെ കൊന്നത്!!!

രണ്ടു കുരുത്തം കെട്ട കവിതകള്‍

2009-11-16T20:23:00.000-08:00

തിളക്കം

തുരുമ്പെടുത്ത ഇരുമ്പു പോലെ
അങ്ങേര്‌ ഉമ്മറത്തിരിയ്ക്കും
വെട്ട്വേമില്ല പോന്ത്വേമില്ല
പിറു പിറുത്തു കൊണ്ടു
അമ്മിക്കല്ലുപോലെ
അമ്മായി അടുക്കളയില്‍ കിടന്നു.
പിറ്റേന്ന് രണ്ടാള്‍ക്കും നല്ല തെളക്കം.
ഒച്ചയുണ്ടാക്കുന്ന ഘടികാരം
രത്രിയിലെങ്ങാനും
ഇരുംപെടുത്തു
അമ്മിക്കല്ലേല്‍ ഒരച്ചുവോ!!

ഷി ഈസ്‌ പ്രെഗ്നന്റ്

തൊഴുത്തില്‍
പശു നിന്നമറുന്നു
കിതയ്ക്കുന്നു
കുതിയ്ക്കുന്നു
കാടിവെള്ളം കമഴ്ത്തുന്നു.
ട്യുബില്‍ നിന്നു ബീജമിറ്റിച്ചു
മൃഗ ഡോക്ടര്‍ അതിനെ അടക്കുന്നു
നഷ്ടപ്പെട്ട രതി കണ്ണുകളിലൂടെ ഒലിപ്പിച്ച്
പശു
പുല്നാമ്പുകളിലേക്ക് നോക്കി
ഒരു പൈക്കിടാവിനെ സ്വപ്നം കാണുന്നു.

പാലം

2009-11-13T05:03:00.000-08:00

പിഴുതു വീണ ഒരു തെങ്ങാണ്
ഞങ്ങള്‍ക്ക് തോടിനു കുറുകെയുള്ള പാലം.

തകര്‍ന്നു വീഴുമ്പോള്‍
രണ്ടു കരകള്‍ നിശ്ച്ചലമാകുമെന്നു
അവകാശപ്പെടാനാവാത്ത എളിയ പാലം.
ഒറ്റയ്ക്കാവുന്നവര്‍ സുരക്ഷിതരാണെന്ന പക്ഷമുള്ള
ആ ഒറ്റത്തടി വൃക്ഷം
ഉടനീളം ജാഗ്രതയുള്ള യാത്ര ആവശ്യപ്പെടുന്നുണ്ട്.
നിവര്‍ന്നു നിന്ന കാലത്തും
ഇന്നേവരെ ഈ കിടപ്പിലും
ആരെയും വീഴ്ത്തിയിട്ടില്ല.
എല്ലാവര്‍ക്കും എല്ലാവരോടുമുള്ള
പിടുത്തം നഷ്ടപ്പെടുന്നുവെന്നതാണ്
പറയുവാനുള്ള ഏക പോരായ്മ
അതു വഴി നടക്കുമ്പോള്‍.
അവകാശ വാദങ്ങള്‍ ഇല്ലാത്തതു കൊണ്ടാവണം
രാംകോ സിമെന്റിന്റെ ഉറപ്പില്ലാഞ്ഞിട്ടും
അതു വഴി എപ്പോഴും ആളുകള്‍ ഉള്ളത്.
എന്നിട്ടും ഞങ്ങളുടെ പഞ്ചായത്തിന്റെ
വില്ലേജ് ഓഫീസിലിരിയ്ക്കുന്ന സ്കെച്ചില്‍
പ്രസ്തുത പാലം അടയാളം ചെയ്തിട്ടില്ല.

വെള്ളക്കെട്ട്

2009-11-09T22:53:00.000-08:00

വെള്ളക്കെട്ട്
ഒന്നേ മുപ്പതു
ഉച്ചനേരം.
ഇന്നലെ
കോരിച്ചൊരിയുന്ന
മഴയായിരുന്നു
ഈ കൊടും ചൂടിനു പകരം.

മഹാഗണിയുടെ ചോട്ടിലെ
കരിയിലകള്‍
നനഞ്ഞ കണ്ണുകള്‍ തുടച്ച്
യാത്ര ചോദിയ്ക്കുകയാണ്
അന്ടപ്പരപ്പുകളോട്!!

നിസ്സാരന്മാരുടെ
ജീവിതത്തിലാണ്
ഇത്രയും കണ്ണ് തുടപ്പും
യാത്ര പറച്ചിലും,
പിറു പിറു ക്കുന്നുണ്ട്
അതുവഴി പോകുന്ന
കാറ്റ്‌.

ഇനി
കുറച്ചു നേരം കൂടി മതി
വെള്ളത്തില്‍ കിടക്കുന്ന
മരത്തിന്റെ നിഴലിനു
മണ്ണില്‍ പതിയ്ക്കാന്‍.

മൂന്നു കവിതകള്‍

2009-11-03T23:41:00.000-08:00

മേല്ക്കൂര

ചോരുന്ന മേല്ക്കൂരയാണ്,
എങ്കിലും മഴ തകര്‍ക്കട്ടെ.
അടുപ്പ് മുതലിങ്ങോട്ട്‌
ഒഴിഞ്ഞ കലങ്ങള്‍
ഇരിപ്പുണ്ടല്ലോ!!

കരുതല്‍

ദ്രവിച്ച പലകകളുള്ള
എന്റെ ബോട്ടിലെ
ലോവര്‍ ഡക്കിലെ
യാത്രക്കാരി
എപ്പോഴും പുറത്തേക്ക്
നോക്കിയിരിയ്ക്കും.
ഏത് കാറ്റിന്റെ ചീള്
തള്ളിക്കയറിയാലും
ഏത് മഴയുടെ തിര തുളച്ചാലും
അവള്‍ ജനലടയ്ക്കുകയില്ല!!
മുങ്ങുന്ന ബോട്ടില്‍ നിന്നു പുറത്തു
കടക്കുന്നതിനെ കുറിച്ചു
അവള്‍ ചിന്തിയ്ക്കുന്നുണ്ട്.

എങ്കില്‍

ആകുമോ ആകാശം
അവകാശപ്പെടാന്‍,
സ്വന്തമായുള്ള ഭൂമിയ്ക്ക്
മീതെ.
എങ്കില്‍ എവിടെ കല്ലിടും
വേലികെട്ടും.
മേഘങ്ങള്‍ വഴി നടക്കുമ്പോള്‍
എങ്ങനെ വിലക്കും.
സൂര്യന്‍ കവാത്തിനിറങ്ങുമ്പോള്‍
ചന്ദ്രന്‍ പാറാവ് നില്‍ക്കുമ്പോള്‍
മഴ പെയ്യുമ്പോള്‍
നക്ഷത്രങ്ങള്‍ പൂക്കുമ്പോള്‍
നിന്റെ വകയില്‍
എന്റെ വകയില്‍
എന്ന് എങ്ങനെ
തിട്ടപ്പെടുത്തും.

ച്യൂയിംഗം

2009-10-29T01:15:00.000-07:00

ഇത്രകാലം ചവച്ചിട്ടും നല്കുന്നു

നല്ല മാധുര്യം നാവിലീ ച്യൂയിംഗം

ജാതിചിന്തകള്‍ ചേര്‍ത്തു പടച്ചോരീ

ച്യൂയിംഗ്ങ്ങള്‍ നീ തുപ്പാതിരിയ്ക്കുക

പുഴയോട്

2009-10-19T02:54:00.000-07:00

ലോറിയുമായി വരുമ്പോള്‍

മണലുമായിട്ടു കിടക്കണം

മുറിച്ചു കടക്കുമ്പോള്‍

ആഴമരുത്

മുങ്ങിക്കുളിയ്ക്കുമ്പോള്‍

ഒരാള് വെള്ളമാവാം

കൊന്നു തള്ളുമ്പോള്‍

കയം വേണം

മുക്കി കൊല്ലുകയും അരുത്

വരണ്ടു പോകുകയുമരുത്‌

മുഴുത്ത മീനുകളുമായി

തെളിഞ്ഞു ഒഴുകിക്കോണം

ഇതാ

ഈ എച്ചിലെല്ലാം

കടലില്‍ ഇട്ടേക്ക്‌

ഗ്ലാസ്‌

2009-10-05T23:43:00.000-07:00

അത് ആരും വിരുന്നു വരാത്ത ഒരു വീടായിരുന്നു.പാത്രങ്ങള്‍ ചിലയ്ക്കാത്ത അടുക്കളയും വെള്ളം നനയാത്ത ധാരാളം കുളിമുറികളുമുണ്ടായിരുന്നു അവിടെ . കരിയിലകള്‍ അപ്പപ്പോള്‍ തൂത്ത് മാറ്റുകയും പൂന്തോട്ടങ്ങള്‍ പരിപാലിയ്ക്കുകയും ചെയ്തു പോന്നു വേലക്കാര്‍.

പല്ലികള്‍ക്ക്‌ ഇഴഞ്ഞു നീങ്ങാനാവാത്ത വിധം മിനുസമാര്‍ന്ന ഭിത്തികള്‍, ചിലന്തികള്‍ക്ക് വല വലിയ്ക്കാന്‍ കഴിയാത്ത മൂലകള്‍, തങ്ങള്‍ ഉപയോഗിയ്ക്കപ്പെടുന്നില്ലെന്നു പരാതി പറയുന്ന മേശ വലിപ്പുകള്‍,

ജനല്‍ വിരികള്‍ക്കപ്പുരം പുറം ലോകം മറഞ്ഞു കിടക്കുന്ന പനി പിടിച്ച ഒരു വീട് .

വിലകൂടിയ ഇലക്ട്രിക്‌ വിളക്കുകള്‍ പലതും തങ്ങള്‍ക്കു ജീവനുണ്ടോ എന്നറിയാന്‍ തരമില്ലാതെ കിടന്നു .

ഒരു രാത്രിയില്‍ അടുക്കളയില്‍ നിന്നു മോഷ്ടിക്കപ്പെട്ടു ഒരു സ്ഫടിക ഗ്ലാസ്‌,അവിടുത്തെ വേലക്കാരി ആയിരുന്നു പ്രതി.ആ മുഹൂര്‍ത്തത്തില്‍ വീര്‍പ്പു മുട്ടലുകളുടെ കൊട്ടാരമായ ആ വീട് എല്ലാ മംഗളങ്ങളും നേര്‍ന്നു ഗ്ലാസ്സിനെ യാത്ര അയച്ചു.വേലക്കാരി ഗ്ലാസ്‌ മടിയിലൊളിപ്പിച്ചുപുറത്തു കടന്നു,ഇത്രമാത്രം ഇരുട്ടും ദുര്‍ഗന്ധവും താന്‍ മുമ്പൊരിയ്ക്കലുമ് അനുഭവിച്ചിട്ടില്ലെന്നു ആ യാത്രയില്‍ ഗ്ലാസ്‌ ഓര്‍ത്തു.

പതിവു യാത്രകളെക്കള്‍ രസമുള്ളതും സുഖമുള്ളതുമായിരുന്നു അവള്‍ക്കും ആ യാത്ര....

മൂന്നു മുറികളുള്ള മുറി നിറച്ചും ആളുകളുള്ള അയ നിറച്ചു തുണികളുളള തകരപ്പെട്ടികളും മണ്ണെണ്ണ വിളക്കുമുള്ള പാറ്റയുംഎലികളുമുള്ള മണവും ദുര്‍ഗന്ധവുമുള്ള അവളുടെ വീട് ഗ്ലാസ്സിനു പ്രിയപ്പെട്ടതായി.

എല്ലാ രാത്രികളിലും വൃത്തിയായി കഴുകി അവളതില്‍ കാച്ചിയ പാലൊഴിച്ചു വയ്ക്കും ഇരുളിന്റെ വേലി ചാടി ഒരാള്‍ പതിയെ വരും രണ്ടുപേര്‍ക്കും ആലസ്യമാര്‍ന്ന കണ്ണുകള്‍ സമ്മാനിച്ച്‌ അയാള്‍ തിരിച്ചു പോകുമ്പൊള്‍ അവര്‍ ഉറക്കത്തിലേക്കു വഴുതും.

തിരിച്ചറിവുകള്‍

2009-10-02T02:17:00.000-07:00

1
ഇതുവരെയുള്ള യാത്രയില്‍
എനിയ്ക്ക്
മനസ്സിലായി
അര്‍ത്ഥം ചുരത്താത്ത
വാക്കുകളിലോന്നാണ്
'അര്‍ഹത'യെന്ന്
2
സഹയാത്രികയായി
കണ്ണ് നീരുള്ളപ്പോള്‍
ഏത് ദുഃഖത്തില്‍ നിന്നും
ഒഴിയാമെന്ന്
3
അടഞ്ഞ വാതിലിനപ്പുറവും
ഇപ്പുറവും
ഓരോ മുറികളുണ്ട്
ഒന്നുകില്‍ വെറും നിലത്ത്
ചാക്ക് വിരിച്ചു സുഖമായുറങ്ങുക
അല്ലെങ്കില്‍ സൌകര്യങ്ങളുടെ മെത്തയില്‍
ഉറക്കം വരാതെ കിടക്കുക
എന്നിങ്ങനെ തരം തിരിക്കുന്ന
ഓരോ മുറികള്‍
4
അലസതയോടെ തടി പിടിക്കുന്ന
ആനയേക്കാള്‍
കുറച്ചേ
ആവേശത്തോടെ പണിയെടുക്കുന്ന
എനിക്കാവുന്നുള്ളൂ
5
ചതി.
മരിയ്ക്കുന്ന ആളിനൊപ്പം
ഒരു മാവ്
കൊല്ലപ്പെടുന്നു.

പായസം

2009-09-24T07:40:00.000-07:00

നല്ല മധുരം
ഓര്‍മകളുടെ പായസത്തിന്.

ഒരു തവി കോരി
മെസേജിലാക്കി
സൌധിയിലുള്ള ഷിബുവിന്
സെന്‍റ് ചെയ്തു.
കുടിച്ചിട്ട് അവന്‍ ഒരു നിക്കറും
എടുത്തിട്ടു മാന്ച്ചുവട്ടിലേക്ക് പോയി.

ഒരു തവി
പൌള്‍ട്രി ഫാം നടത്തുന്ന
സന്ഞുവിനു പാര്‍സല്‍ ചെയ്തു.
മൂന്ന് പ്രാവശ്യം തമിഴ്നാട്ടിലോട്ടും
ഒരുവട്ടം ബാംഗ്ലൂരിലേക്കും
നാടു വിട്ടിട്ടുണ്ട് കക്ഷി,
തരമില്ല മധുരിക്കാന്‍

ഇതാ മുന്നില്‍ കുറച്ചൂടെ
കോരെടാന്നും പറഞ്ഞു
ശങ്കരന്‍.
പേപ്പട്ടി കടിച്ചതും
മരത്തേന്നു വീണതും
അവന് മധുരിക്കുന്നുവെന്ന്
(അവന്‍ അങ്ങനാ മരണവീട്ടില്‍ ചെന്നാലും ചിരിക്കും)

വിചാരിച്ചതേയുള്ളൂ
കെ.എസ്. യു കാരന്‍ രാജേഷ്‌ എത്തി
സൊറ പറഞ്ഞു ചുമ്മാതെ ചിരിച്ചിട്ട്
സ്വല്‍പ്പം നുണഞ്ഞു
അവന് ഓര്‍മ വന്നത്
എസ്.എഫ്‌.ഐ യുടെ തല്ല്.
ചിരി മാഞ്ഞുവോ ആവോ.

സ്കൂള്‍ വഴിയില്‍ മിഠായി വില്‍ക്കുന്ന
മുത്തി വന്നപ്പോള്‍
കൊടുക്കുവാനുള്ള കാശ്‌ ചോദിച്ചു.

കണക്കു മാഷ്‌ പായസം
വേണ്ടെന്നു പറഞ്ഞു
ഷുഗര്‍ ആയതു കൊണ്ടല്ല
കളത്തട്ടിലിരുന്നു കൊഞ്ഞനം
കുത്തുന്നവരെ കാണണ്ടെന്ന്.
ഞാന്‍ മുഖം കുനിച്ചു നിന്നു
(അന്നും ഇന്നും അങ്ങനെ തന്നെ)

അപ്പോഴുണ്ട്
മിനി വരുന്നു .
സ്റ്റൈലില്‍ ഒരു കുടി.
ചോദിക്കുവാ
അന്ന് ചോദിച്ചത് തരട്ടേന്നു
ഇപ്പോഴോ ...............
എനിക്ക് നാണം.
അയ്യട. ....
അവള് കുഞ്ഞിനെ കൊണ്ടു
ഒരു ഉമ്മ തരീച്ചു.

നല്ല മധുരം
ഓര്‍മകളുടെ പായസത്തിന്.

ചുരുക്കം

2009-09-15T02:23:00.000-07:00

വേടന്
മയിലൊരുപിടിപ്പീലി

എവിടെ

2009-09-09T02:42:00.000-07:00

മുറ്റത്ത്
മഴ വരച്ച
കുഞ്ഞു വൃത്തങ്ങള്‍
എവിടെ

ചെറു കല്ലുകള്‍
പുഴയിലിട്ടപ്പോള്‍
അവിടെ

Publish Post

ജ്യേഷ്ഠന്‍

2009-08-24T08:50:00.000-07:00

അമ്മയുടെകണ്ണുനീരാണ്
എന്റെ മൂത്തജ്യേഷ്ഠന്‍.

അടുക്കളയില്‍ വച്ചാണ്
ജ്യേഷ്ഠന്‍ അമ്മയെ കാണാന്‍ വരാറ് പതിവ്‌
പരാതിയോ കെറുവോ
സ്നേഹമോ നിരാശയോ
അമ്മ അറിയിക്കാറുണ്ട് നിത്യം
ജ്യേഷ്ഠന്‍ വരാറുണ്ട് നിരന്തരം.

അമ്മയെ കണ്ട് എന്നെ കണ്ട്
ഞാന്‍ കാണരുതെന്ന് തത്രപ്പെട്ട്
പൊയ്ക്കളയും.

അന്നൊക്കെ
അമ്മയുടെ കണ്ണുകളില്‍ നിന്നും
ഇറങ്ങി വന്ന്
എന്റെ മുടിയിഴകളില്‍ വിരലോടിക്കുമായിരുന്നു.

മൂന്നാം ചലന നിയമം

2009-08-08T09:52:00.000-07:00

ഞാന്‍ നനഞ്ഞ് കടത്തിണ്ണയിലേക്ക്
കയറുന്നു .

ഒരു നായ

അവിടുന്ന്

പുറത്തേക്കിറങ്ങി നനയുന്നു.

ഓപ്ഷന്‍

2009-08-07T07:22:00.000-07:00

കൊമ്പുകളുലച്ച്
ഇലയും പൂവുമിറുത്തിടും
താഴെ വന്ന്
ആയതെല്ലാം പൊക്കിയെടുത്ത്
വട്ടമിടും കാറ്റ്.

ശാസ്ത്രത്തിന്റെ പുസ്‌തകം
മേശമേലിരിക്കട്ടെ
ദൈവം ഊതുന്നതാണ് കാറ്റ്.

ഓരോ ഊത്തിനും

ഈരണ്ടോപ്ഷനുണ്ട്:

(എ)അണയ്ക്കുക
(ബി) കത്തിയ്ക്കുക

ജന്മ നാട്

2009-07-29T10:07:00.000-07:00

പിഴിഞ്ഞ് പിഴിഞ്ഞ്
പിഞ്ഞിപ്പോയി
എങ്കിലും
കഞ്ഞി മുക്കി ഉണക്കുമ്പോള്‍
പടക്കനെയാവുന്നു
എന്‍റെ ജന്മനാടെന്ന
പതാക.

പുതിയ മുഖം

2009-07-29T08:39:00.000-07:00

പശുക്കിടാവ്
വലിച്ചു കൊണ്ടു ഓടുന്ന
പാവാടക്കാരിയെ

വരാലിനെ
ചൂണ്ടയ്ക്ക് പിടിയ്ക്കുന്ന
അവളുടെ ഉടുപ്പിടാത്ത
ആങ്ങളയെ

അടുത്തിരുന്നാലും
ഒച്ചയിട്ടു വിളിയ്ക്കുന്ന
നെറ്റി നിറച്ച് വിയര്‍പ്പുള്ള
അവളുടെ അമ്മയെ

ചീത്ത മാത്രം ഭാഷിയ്ക്കുന്ന
അല്ലാത്തപ്പോള്‍ വീട്ടില്‍ ഉണ്ടാവാത്ത
അവളുടെ അച്ഛനെ

വേലിയ്ക്കലെ ചെമ്പരത്തിയുടെ
ഇലകള്‍ നുള്ളി
അവളെ എത്തി നോക്കാറുള്ള
കോന്ത്ര പല്ലുള്ള
അയല്‍ക്കാരനെ

പകുതി കാണുമ്പോള്‍
കൂട്ടുകാരികള്‍
കളിയാക്കി മുടക്കുന്ന
അവളുടെ സ്വപ്നങ്ങളെ

എന്‍റെ ഗ്രാമം മറന്നു തുടങ്ങുന്നു

ഞാനും ഗ്രാമത്തിന്‍റെ
പുതിയ മുഖത്തിന്‍റെ
മിനുക്ക് വേലകളിലാണ്.

മൂവന്തിപ്പുഴ

2009-07-25T08:43:00.000-07:00

കവിതയ്ക്കൊരുവരി നേടാന്‍ വേണ്ടി
ഞാനും പോയി പുഴക്കരയില്‍.
മറുകരയില്‍ ഒരു വാക മരം
ചുവന്ന പൂവുകളെറിയുന്നു
പുഴ പൂക്കളുമായിട്ടൊഴുകുന്നു.

അവിടവിടെച്ചെറു തുമ്പികള്‍ പതിയെ
പുഴയെ തൊട്ടു വണങ്ങുന്നൂ
കര വരണ്ട തൊണ്ട വിടര്‍ത്തി
ചെറിയൊരു ഓളം കാത്തു കിടക്കുന്നു.

ഒരൊറ്റയൂക്കിന് പുഴയില്‍ വീണും
മറിച്ചൊരൂക്കിന് തിരികെപ്പോന്നും
ഭയപ്പെടുത്തീ പൊന്‍മാന്‍
അവിടെയലഞ്ഞു കണ്ടൂ പ്രാപ്പിടിയന്‍.

കുമിളകള്‍ തീര്‍ക്കാന്‍ വല്ലപ്പോഴും
മുകളില്‍ വന്നൂ മത്സ്യങ്ങള്‍
ഒരിയ്ക്കല്‍ മാത്രമൊരോലത്തുമ്പ്
ഒഴുകിയുമാ വഴി വന്നു

അലസനായൊരു കവിയുടെ
കാലില്‍ തട്ടി മറിഞ്ഞതു പോല്‍
ചായം വീണു പരന്നു മലകള്‍
മൂവന്തിപ്പുഴ പുളകമണിഞ്ഞു.

പുഴയില്‍ മുക്കി നനച്ചൊരു തൂലിക
നെഞ്ചിലെടുത്തു നടന്നു ഞാന്‍
നനഞ്ഞ കാല്പ്പാടൊഴിയും വരെയും
കൂട്ടിനു വന്നൂ പുഴ വെള്ളം

അച്ഛന്‍റെ പാട്ട്

2009-07-25T08:05:00.000-07:00

അച്ഛനുറക്കത്തില്‍ പാടുന്നുണ്ട്
ചീത്തപ്പാട്ടുകള്‍ പാടുന്നുണ്ട്
ഒറ്റമുറിയുള്ള വീട്ടിലമ്മ
എന്നെയുറക്കുവാന്‍ പാടുപെട്ടു
കൊഞ്ചിച്ചു കൊഞ്ചിച്ചു കാതിലമ്മ
പാട്ടിനെതിര്‍ ശ്രുതി പാടിത്തന്നു.
ഉറക്കം നടിച്ചു കിടന്നു ഞാനോ
അച്ഛന്‍റെ പാട്ടിനു താളമിട്ടു.

പരത്തി എഴുതിയ കവിതകള്‍

2009-07-22T23:34:00.000-07:00

-1-

ആവശ്യമാണെന്നാലും
ആകുലപ്പെടുത്തുന്നു
കവിതകള്‍,പ്ലാസ്റ്റിക്കുകള്‍

-2-

മണ്ണില്‍ വീണ പഴം പോല്‍

മണ്ണു പറ്റിക്കിടക്കുന്നു
ഉളളിലുളള വിചാരങ്ങള്‍

-3-

കൈമറയ്ക്കുള്ളിലണയാതെ

കൊണ്ടുവന്നൂ വെളിച്ചത്തെ

കാത്തു വച്ചൂ വിളക്കുകള്‍,

കാറ്റിനോടു കടപ്പാട്.

-4-

പ്രതികരിച്ചു നാം നേടിയ

പലതുമെവിടെ നോക്കിയാല്‍
ജീനുകള്‍ക്ക് മാറ്റമില്ല,
എത്ര കീറിമുറിക്കിലും.

കവിത

2009-07-20T09:56:00.000-07:00

മുറത്തില്‍ അരി അളന്നിട്ടു

കല്ലും നെല്ലും തിരിയുകയായിരുന്നു

മുത്തശ്ശി.

അവരുടെ മുറുക്കാന്‍ കറ പിടിച്ച

പല്ലുകളില്‍ വെയില്‍

വന്നു വീഴുമ്പോള്‍

ഞാന്‍ ആദ്യമായി

പവിഴക്കല്ലുകള്‍ കാണുന്നു.

മഴ

2009-07-19T08:35:00.000-07:00

- 1 -

ഇടവപ്പാതിയുടെ ഒരു കുടം വെള്ളം കെട്ടിക്കിടക്കുന്ന വീട്ടു മുറ്റം.

ഇളം വെയിലിന്‍റെ വിരലുകള്‍ തലോടി കൊണ്ടിരിക്കുന്ന

ഓട്ടു പാത്രത്തില്‍ നിന്നു പൊഴിഞ്ഞു

പോകാന്‍ കൂട്ടാക്കാതെ മിനുങ്ങിക്കൊണ്ടിരിക്കുന്ന

നാലഞ്ച് മഴത്തുള്ളികള്‍..

-2-

എന്നെപ്പോലെ പുലര്‍ന്നിട്ടും പുതപ്പിനുള്ളില്‍ നിന്നും പുറത്തേക്ക് വരാന്‍ കൂട്ടാക്കാതെ സൂര്യന്‍ ചടഞ്ഞു

കിടക്കുകയായിരുന്നെന്കിലോ .

-3-

ചായയ്ക്ക് വെള്ളം തിളയ്ക്കുന്നത്‌പോലെ അച്ഛന്‍ കൊപ്ലിക്കുന്നുണ്ട് പുറത്തു

-4-

എന്നെപ്പോലെ ചില ചെറുപ്പക്കാര്‍ക്ക് ഒരു മുറപെണ്ണിന് വേണ്ടിയും കൊതിയ്ക്കണം

-5-

അവള്‍ പതുങ്ങി വന്നിട്ട് പുതപ്പും എടുത്ത് ഓടി മറയുന്നു

ശകാരിച്ചുകൊണ്ടു പുറകെ ഓടിച്ചെന്നു കാണാമറയതത് വച്ചു ...............

ഞാന്‍ പറഞ്ഞില്ലേ,

-6-

വീണ്ടും മഴ .

നനയുന്ന ഒരു ഇലയുടെ അടിയില്‍

നനയാതെ ഒരു ശലഭം .

-7-

ഓട്ടുപാത്രം നിറഞ്ഞിട്ടും

മഴ തുടരുന്നു .

മനപ്പൂര്‍വം മറന്നിട്ട കൈലി അയയില്‍ കിടന്നു

പൊറീതി മുട്ടുന്നു .

ചായ്പിലെ വാരിയില്‍ ചിലന്തി വല മൂക്കള പോലെ തോന്നിച്ചു .

-8-

പുഴുങ്ങിയ കാച്ചിലിന്റെ ആവിയില്‍

അനുരക്തനായി അച്ഛന്‍ അടുക്കളയില്‍

അമ്മയെ പറ്റിക്കൂടി.

-9-

മഴ തുടരുന്നു ....

അഭയം നഷ്ടപ്പെട്ടു ശലഭം നിലം പതിച്ചു.

ഉരുട്ടിയ കണ്ണുകള്‍ കൊണ്ടു അച്ഛന്‍ പുതപ്പു

വലിച്ചു മാറ്റി.

വീണ്ടും ചൂടാക്കിയ ചായ കുടിച്ചു ഞാന്‍ ഉണര്‍ന്നു .

-10-

കോണകം വരെ നനഞ്ഞിട്ടും വാരിയിലെ ചോര്‍ച്ച കണ്ടുപിടിക്കാന്‍ കഴിയാഞ്ഞ്

പട്ടിയെ തള്ളി മഴയത്തിട്ട മൂപ്പീന്ന്

എന്റെ നാട്ടുകാരനാണ് .

ഓരോ മഴ വരുമ്പോഴും

അങ്ങേര്‍ എന്നെ ചിരിപ്പിക്കുന്നു .

-11-

ഇത്രയും

തണുപ്പ്‌ ഇല്ലായിരുന്നെങ്കില്‍

ഞാന്‍ ഇങ്ങനെ

മഴയെ സ്നേഹിക്കുമായിരുന്നോ ...

കവിത

2009-06-21T07:24:00.000-07:00

ഒരുങ്ങിവന്നിട്ട്
പെയ്യാതെ പോയീ
മഴ.
ഉമ്മറത്ത്‌ അഹങ്കരിച്ചു പറന്നിരുന്ന
കടലാസിനെ മുറ്റത്ത്‌ വിളിച്ചിറക്കി
നനയ്ക്കാന്‍ മറന്നിരുന്നില്ല

മഴ.